Ubulala umkakhe afihle umzimba emlindini wesambane
Providence Moyo
Amapholisa esabelweni seMatebeleland North adinga indoda yaku ward 7 eTsholotsho endaweni ethiwa yiGulalikabili eleminyaka engamatshumi amathantu lasithupha (36) esolwa ngokubulala umkayo ngenyanga edluleyo.
Ekhuluma le Community Podium, isikhulumeli samapholisa esigabeni umnumzama Glory Banda uthe uDingumuzi Sibanda kusolelwa ukuthi wabulala umkakhe uSikhangezile Tshuma bevela emcimbini ePatalika lapho umsolwa lomkakhe abalwa khona uSibanda esithi umkakhe ulobudlelwano lomunye umlisa owayekhona lapho emcimbini kodwa izakhamizi zabakhuza.
“Basebesuka belubhekise emzini wabo ongaba ngama khilomitha ama bili ma usuka endaweni okwakulomcimbi khona. Bathe besegangeni elandulela iGulalikabili le Patalika uSibanda wahlasela umkakhe ngengqamu lehloka waze wabhubha . Umsolwa wasethatha umzimba womkakhe wagqiba emgodini wesambane waqhubeka ngohambo eqonde emzini wakhe.
Esebucwadlane lesigaba sakibo wahlangana lesinye isakhamuzi esananzelela igazi empahleni zikamsolwa sasesimbuza ukuthi ngabe ujimbile, umsolwa wathi ujimbe impunzi atshiye eyihlinzile egangeni kodwa lubaba kazange amkholwe umsolwa ngoba wayengayiphathanga leyompunzi ayekhuluma ngayo ngakho wamekela uSibanda waqhubeka ngohambo lwakhe laye lubab waqhubeka esiya emcimbini.
Wahamba ekhathazekile lubaba wathi lanxa efika emcimbini watshela amanye amadoda ngensolo zakhe, basebemsthela ukuthi umsolwa ubeke watshaya umkakhe emini ngaphambilini basebesuka belandela lapho uSibanda lomkakhe ababehambe khona bazabafika lapho akwabulawelwa khona umuyi. Lawa amadoda alandela umzila wamathonsi egazi ayekhanya emhlabathini baze bayafika emlindini okwakufihlwe khona amalunga omzimba kamuyi. “UBanda ukhuthaze ukuthula phakathi kwabantu beMatebeleland North esithi ukuchitheka kwegazi mahlayana sekwandile esigabeni.
Umkhokheli wesigaba induna USiposo uveze ukudana ngalesi sigameko wacela abantu bakhe ukuthi bangahlukumezani ngobulili kodwa bahlale ngokuthula, nxa kukhona abangaboniso linye ikakhulu kwabathatheneyo bacele uncedo kunkokheli ezigoqela osebhuku, abafundisi kanye layo induna ukuze kwenqatshelwe ukubulawa kwabantu besifazana.
“Ngilusizi kakhulu ngalesi isiga kuyisifiso sami ukubona ukuhlukumezana phakathi kwabathatheneyo kuncipha, ngikhuthaza ukuthi abesilisa bahloniphe omkabo babavikele ezingozini. Nxa kukhona ukungezwani abantu kababuye sikhulumisane sincedisane, ngiyabamukela ababuya lezikhalazo sidinge isisombululo sindawonye kungela kuhlukumezana lokuchitheka kwegazi”.
