Alulula uhambo kwezombusazwe kwabesifazane
Owesifazane owanqoba kukhetho olusanda kwedlula kwele Zimbabwe ukhuthaza abesifazane abafisa ukungena kwezombusazwe ukuthi bame isibindi ngoba kungekho lula ukuphumelela kowesifazane kwezombusazwe ngenxa yodlakela lokuhlukuluzana okwande ukubakhona elizweni nxa sekusondele isikhathi sokhetho.
UNkosazana Thando Ndaba owanqoba ukuba ngukhansila ku ward 14 eLupane wakutsho lokhu ekhuluma kumsakazo weSkyz Metro FM kuhlelo ‘Ilihlo Lemaphandleni’ lapho aveza khona ukuthi ukuze owesifazane aphumelele kwezombangazwe kudingakala ukuthi abelesibindi, abekwazi njalo ukudlulisa axole ezinye izigaba ezinzima adlula kuzo.
“Kakulula ukungena kwezobukhokheli ungowesifazane ngoba uyadlula ebunzimeni obukhulu. Ngake ngathola imibhida yami iqunyiwe esivandeni kodwa angizange ngenze umsindo ngalokho ngakudlulisa ngoba ngisazi ukuthi yindlela yokungicikela phansi njalo kwakuyimizamo yokuthi ngitshiye phansi kwezokhetho kodwa ngaqinisela ngahamba ngenjongo yami kwaze kwafika ekucineni komjaho lapho sengiphumelele.
Ngesinye isikhathi uyathethiswa ikakhulu nxa ungendanga noma kuyikuthi umkakho watshona abanye basebenzisa lokhu ukuthi bakuncindezele. Mina ngake ngathethiswa abanye besithi umuntu ongumfelwakazi angakhokhela njani kodwa lokho akungenzanga ngalilahla ithawulo ngaginya ilitshe kwaze kwabasekuphumeleleni kwami nginjalo ngingumfelwakazi.”
UNkosazana Ndaba uthe uzimisele ukusebenzela umphakathi njengoba ekhangelele ukuthi abuyiselwe njalo emsebenzini ngokhetho oluzaqhutshwa ngo 2028. Uthe lokhu kudinga ukuthi asebenze gadalala afeze izethembiso azenza ngesikhathi ekhankasa njengoba ezimisele ukusebenzisana lesigaba ukuze kubelemphucuko elizweni.
“Ngananzelela ukuthi isigaba sakithi asilazo izikolo ezaneleyo njalo indaba yamanzi iyasihlupha, ngakho ngasengithola ugqozi lokungena kwezobukhokheli ukuthi lami ngizame lokho engingakwenelisa ukuxazulula loludaba sisebenzisana lesigaba ngoba imphucuko iza abantu bebembisana.”
Ilihlo Lemaphandleni luhlelo olulethwa yi Community Podium ngalolonke oLweSine ngehola lekuqala emini ngenjongo yokucubungula lokucwayisisa izehlakalo ezitshiyeneyo ezigabeni ze Matebeleland jikelele.
