Ukhansila ukhala ngokusweleka kwezikhungo zentsha eGwanda
NguProvidence Moyo
Owesifazana omele isigaba sesithathu (Ward 3) eGwanda uthi ukhathazekile ngokusweleka ngezikhungo zentsha (youth centres) esigabeni sakibo.
UNkosazana Linda Moyo uveze lokhu ngesikhathi ekhuluma le Community Podium kuhlelo “ilihlo lemaphandleni” lapho athe lokhu kungezinye zembingala zokusetshenziswa kwezidakamizwa lokumemetheka kokwenda kwabantwana esigabeni.
“Asila zikhungo zabatsha okwenza inengi labo baphephele kuzidakamizwa kukanti kungaba lezikhungo abatsha bayathola izinto zokwenza befundiswa njalo befundisana ikakhulu imisebenzi yezandla ezabuya ibelilifa labo. Lezi zakhiwo nxa zikhula ziyanceda ukuthi umntwana ahambe ayedlala khona akhule kodwa lapha kulesiko lokuthi umntwana angaqeda isikolo kubanga lesine kumfundo ephakeme abesezibona engani sekhule ngokwanele ukuthi ayenze noma yini ayifunayo, abanye bacina besenda kukanti abanye bakhona njalo bayanikwa imithwalo batshiywe benjalo besekuthi abafana bona bayayenza okwezidakamizwa ngoba bengelayo indawo ebagcina besebenza “.
Ubuye njalo UNkosazana Moyo wengeza ngokuthi izikhungo zentsha zibuya zibenze babambene babemunye abantwana.
“Nxa betshona bonke abantwana besebenzisana kuletha inguquko enkulu esigabeni ngoba bayabambana njengoba bayabe bencedisana ukwenza izinto lesezikhungweni okubuya kubalungiselele impilo ngokuvuselela ubuntu bokuthi “umuntu ngumuntu ngabantu” njalo kubenza bakwazi ukunceda omunye umunth ngakho abantwana esigabeni sethu basalela emuva ngoba bengelazo lezi izakhiwo”.
Ilihlo lemaphandleni luhlelo olulethwa yi Community Podium ngalolonke uLweSine ngehola lakuqala emini kuSkyz Metro FM ngenjongo yokuhlaziya lokucubungula izehlakalo ezenzeka esabelweni se Matebeleland.
