Abantu abakhubazekileyo bayafihlwa eMatebeleland
Providence Moyo
Inhlanganiso esebenza labantu abakhubazekileyo ezabalweni zeMatebeleland ithi ikhathazekile ngendlela okuphathwa ngayo abantu abagogekileyo.
Ekhuluma ngesimo okuphathwa ngaso abantu abagogekileyo kuSkyz Metro FM izolo kuhlelo “ilihlo lemaphandleni” unkosazana Constance Sibanda obemele inhlanganiso ye Zimbabwe Women with Disabilities in Empowerment (ZWIDE) uthe abantu abagogekileyo bayafihlwa emphakathini.
” Kungani bayayangisa ukuthi bavezwe phandle bayafihlwa abanye bakhona size sihambe sisenza okokubavumbulula njalo okubuhlungu kakhulu yikuthi labakhokheli bezigaba abagoqela osobhuku bayabe bengakwazi ukuthi ezigabeni zabo bakhona abantu abanjalo.”
UNkosazana USibanda ubuye waveza njalo ukuthi isimo lesi sibhahe kakhulu eMatebeleland South koNdolwane.
Ubuye njalo wakubeka obala ukuthi lesi isimo senziwa yikuswelakala kolwazi ekuphatheni abantu abagogekileyo.
“Abantu abalalwazi olaneleyo ngokuphathwa kwabagogekileyo, bababona bengani abasobantu ngokwaneleyo kanti njalo bayeyiswa ngakho kuqakathekile ukuthi inhlanganiso ezisebenza labantu abagogekileyo zisabalalise ulwazi ukuze izakhamizi zasemaphandleni zibekwazi ukuthi laba abantu labo balamalungelo njengaye wonke umuntu njalo abantu bayalingana”.
Egcizelela ngokusweleka kolwazi uMaSbanda ugqugquzele inhlanganiso ezisebenzela eMatebeleland ukuthi zizame ukungena ziguduza ezabelweni ezisebenzela kuzo zidinga abantu abafihlweyo njalo zisabalalise ulwazi ebantwini ngoba luyilo olunganceda ukuguqula isimo lesi.
Ubuye njalo wakhuluma ngokuthi abantu abagogekileyo abalawo amathuba emsebenzini.
Isisekelo sombuso welizwe sithi abantu bayalingana kungenani lokutshiyana kwezimo njalo ngo 2030 ilizwe lilwisa ukuthi kungabikhona umuntu ongabe esalele emuva kodwa kubesekulokulingana okusezingeni eliphezulu okugoqela ukulinganiswa kwamathuba kuzozonke izizalwane zase Zimbabwe.
Ilihlo Lemaphandleni luhlelo olwenza ku Skyz Metro FM ngolwesine maviki wonke lulethwa yi Community Podium ngenhloso yokuveza lokubonisa izimo ezehlukeneyo ezenzakala eMatebeleland.
