Ithatha ezimbili izicoco kwele SA imbongi yaseFolosi
Imbongi yaseVictoria Falls, eZimbabwe uObert Dube owaziwa kakhulu ngokuthi yimbongi yeAfrica, (the African poet), wamukele izicoco ezimbili zivela ku Amaqhawentaba music Awards kwele South Africa.
Ekhuluma le Community Podium, Dube ubonge usekelo aluphiwa ngabantu elizweni ngesikhathi ecela ukuvotelwa.
“Ngempela umuntu ngumuntu ngabantu, abantu bakithi ngiyababonga ngoba kusukela ngiqala ukuhaya lokugiya ngosiba ngathola usekelo okuyiwo umthombo wokuphumelela kwami lalamhlanje ngilesithunzi kumhkaba wonkekungxa yokwesekwa uxhaswa ngabantu abatshiyeneyo abangibamba lapho ngisiwa bangivuse. Isizwe sakithi ngiyasithemba ikakhulu nxa ngikhangele la engisuka khona kuzofika la engikhona angiluhambi ngedwa loluhambo, usekelo lolu lubonisa ukuthi abantu bayawuthakazelela umsebenzi wami ngakho ngizizwa ngihloniphekile kakhulu.”
Ubuye njalo uDube wakhuthaza abatsha abafisa ukulandela emzileni ukuba babelokubekezela okukhulu ngoba ezemidlalo azilayo imali etheni, “uyenelisa ukuba ngowezemidlalo odumileyo umhlaba wonke jikelele kodwa umpunga ungelalutho ngakho kufuneka umuntu okhaliphileyo olesineke”.
UDube utshaye wathintitha kusicoco sowesilisa ohamba phambili kwezemidlalo (Best male artist) wabuya wathatha njalo kundima yohamba phambili kwezokuhaya inkondlo (best poet).Lezi zicoco zilandela esinye njalo asithola ngo Nhlolanja lonyaka esigodlweni iHarare ngesikhathi kusenziwa iNational Arts Merit Awards (NAMA) kisukela eqala ezemidlalo uDube usethole izicoco ezilitshumi lambili (12) zivela kunhlanganiso ezehlukeneyo.
Ngaphandle kokwakha isithunzi sakhe, uDube uyancedisa njalo abatsha abafisa ukuhaya inkondlo esigabeni.Uyimbongi ehlonitshwayo elizweni langaphandle, uyamenywa emithimbeni etshiyeneyo ukuthi azohaya. Ngomyaka ophelileyo, wamenywa ukuhaya elizweni lase Germany, wahaya njalo eTanzania, South Africa kwamanye.
