Isomiso sibulala izifuyo eMatebeleland
nguProvidence Moyo
Bayakhala abalimi emhlubulweni weMatebeleland ngesomiso esibikwa sesidale umonakalo ezifuyweni. Lokhu kuvele lapho ekhuluma kuhlelo ilihlo Lemaphandleni umnumzana uDumisani Nyoni olilunga lenhlanganiso ekhangela ngezokulima lezokufuya phecelezi Agricultural Extension (Agritex ) esabalelweni seMatebeleland North uthe isomiso somnyaka u2023-2024 sesenze balahlekelwa yizifuyo ngendlela ezitshiyeneyo ezigoqela umkhawuzane osubulele izifuyo.
“Ngesikhathi izulu lingekho, komile kunje uzathola ukuthi isihlahla somkhawuzane sesihlumile sesiluhlaza tshoko okukhanga izifuyo zibesezisidla, ziqumbe besezisifa ngoba lesi sihlahlakazana siyabulala”
Ubuye njalo waveza ukuthi ukusweleka kwezulu sokwenza kubenzima ukudibhisa inkomo zabo okuyindlela yabafuyi yokubulala izinanakazana ezingadala imikhuhlane ezifuyweni okugoqela imikhaza lezibawu kanye leyokuvikela izifuyo kumikhuhlane eyehlukeneyo.
“Enkomeni ezilitshumi, eziyisithupha zibulawa yimikhuhlane ebangwa yimikhaza. Ukudibhisa kuqakathekile ngoba kuyavikela izifuyo kukanti kulabo abayabe bengadibhisi, lokhu kufaka lenkomo zalabo abadibhisayo engcopheni ngoba umkhuza owodwa ulakho ukubekela amaqanda afika inkulungwane ezintathu kusiya kwezinhlanu (3000-5000) besekuthi imikhazanyana echanyiselwa kulawo maqanda ilakho ukukhula okwesikhathi eside ingatholanga ukudla”.
Ubuye njalo wengeza ngokuveza ukuthi kulemihlobo emithathu yemkhaza. Owokuqala ngophila esifuyweni esisodwa, owesibili ngophila ezifuyweni ezimbili kukanti owokucina ngophila ezifuyweni ezintathu. Kule imihlobo, owesibili lowesithathu ichazwe njengemihlobo eyingozi kakhulu ngoba iyamemethekisa imikhuhlane ngokuphila kuzifuyo ezedlula esisodwa.
Ilihlo lemaphandleni luhlelo olwenzakala kumsakazo we Skyz Metro FM ngalo lonke uLwesine ngenjongo yokucubungula lokucwayisisa izimo ezehlukeneyo ezenzakala emaphandleni aseMatebeleland.
