Ikhuba liyatshona – ziyakhala izakhamizi zako Bulawayo ngezidakamizwa
Providence Moyo
Izakhamizi zako Bulawayo zithi isimo sezidakamizwa ezisetshenziswa ngabatsha siyamemetheka emzini wamakhosi lamakhosikazi.
Ekhuluma lentathelindaba ye Community Podium, omunye umhlali wako Bulawayo uMnumzana Makhosini Ndlovu ohlala eCowdrypark uthe njengezakhamizi bakhathazekile ngalesi isimo ngoba sibulala ikusasa labatsha.
“Impilo zabantwana ziyatshabalala ngezidakamizwa kanye leyesizwe kuyinto nje enziwa ngabomo. Ngubani ozaphatha kusasa nxa bona esithi ngama future leaders becwila kuma drugs abafana kanye lamantombazana sekufanana akula kuthi lowu bonke nje.”
Ekhuluma ngodaba olufanayo, omunye njalo umhlali wako Bulawayo uMnumzana Austin Khabo uthe abomthetho kumele bayihluzusise indaba babelesigwebo esikhangelane lezidakamizwa uthe, “Ukuthi laba abantu bafunde isifundo yikuthi kube le mandatory sentencing kubantu abathengisa izidakamizwa ngoba babulala isizwe becabangela izikhwama zabo kuphela.”
Ekhuluma, entanjeni zokuxhumana kuMatebeleland Council for the Welfare of the child, omunye umhlali wakoBulawayo uthe lesi isimo sibephula umoya njalo indaba yakhona ijulile ngoba ekucineni abatsha babalesandla nxa bengayiswela imali yokuthenga okucina kubadonsela ezandleni zamapholisa noma entolongweni.
Iskhulumeli samapholisa ko Bulawayo UInspector Abednico Ncube uncome izakhamizi zako Bulawayo esithi zibonakala zizimisele ekulwisaneni lezidakamizwa.
“Abanye esibabophayo sizuza ama tip offs kuzakhamizi, lokhu kwenza umsebenzi wethu ubelula kakhulu njalo ngithanda ukuxwayisa abantu abasebenzisa abantwana ukuthi babathengisele izidakamizwa ngoba sizimisele ukusebenzisana lomphakathi ukuxazulula udaba lwezidakamizwa”.
Ubuye njalo uNcube waveza ukuthi izidakamizwa ezisetshenziswa kakhulu zimbanje le crystal meth.
