UDlamini kakhathazeki ngokukhalala kukaMwonzora
Unathi Mpofu
Oncintisa esigabeni seHwange West Constituency uMnumzana Somveli Dlamini emele ibandla leMDCT uthi ukukhalala kukaMongameli webandla lakhe uDouglas Mwonzora akusoze kumphambanise ekukhankaseni kwakhe ngoba abantu beHwange West bakhangelele kuye ukuze alethe intuthuko.
Ekhuluma lentatheli yendaba ye Community Podium, uDlamini ugcizelele amazwi kaMwonzora awokuthi abemthethwandaba bahlasela ibandla leMDC T kodwa uzaqhubeka ngomsebenzi wokukhankasa ukuze enelise ukumela izakhamizi zeHwange West.
UDlamini uthe; “Kubuhlungu ukuthi abemthethwandaba basebenzisa amandla abo ngendlela engasiyo ngoba bavimba abanye bethu ukuthi bancintise kukhetho lolu oluzayo. Okunye okudabukisayo yikuthi abanye engincintisana labo bethusela abasekeli bami ikakhulu endaweni zemakhaya eHwange West. Abanye abalandeli bami lebandla leMDC bathenjiswa ukutshaywa Kanye lokuncitshwa inhlanyelo eziphiwa abanye ngohulumende.”
Ekhuluma lenthatheli zendaba esgodlweni eHarare ngolwesibili, UDouglas Mwonzora uthe kasancintsisi kukhetho lukaMongameli oluzenzakala mhlaka zimatshumi amabili lanthathu kuli nyanga kaNcwabakazi. UMwonzora uthi wenze lokhu ngenxa yokwaliswa kwamalunga akhe angu 87 ekuphathekeni kukhetho.
Abaphethe ingqubo yezokhetho abeZimbabwe Electoral Commission (ZEC) bathe ukukhalala kukaMwonzora kungabe sokuphuzile ngakho igama lakhe lizabe likhona kuballot paper.
Kusenjalo, UDlamini uqhubekele phambili ngokuthi umkhankaso wakhe uphanjaniswa yizitha zakhe ezihamba zikhipha amaposta akhe kodwa ukhuthazwa yikuthi abasekeli bakhe baqhubeka ngokumsekela.
UDlamini obengusodolobho we Victoria Falls okweminyaka emihlanu edluleyo uthi abantu bathokoza kakhulu ngomsebenzi awuphathayo esanguSodolobho njalo ufisa ukuqhubeka ngomsebenzi lowo ephalamende.
Abancitisa lo Dlamini bahlanganisela uPhilani Moyo oweZANU PF, uVusumuzi Moyo owebandla leCitizens Coalition for Change kanye lo Ditshoni Nkomo oweZAPU.
Okhokhela ibandla leCitizens Coalation for Change, uNelson Chamisa ukhangelelwe ukwenza umkhankaso wakhe eHwange West Constituency kukanti ibandla elibusayo eleZANU PF likhangelelwe ukwenza unkhankaso ofanayo Vulindlela Secondary School ngolwesihlanu. Iskhulumi sePalamende uJacob Mudenda ukhangelelwe ukuthi akhulimisane labasekeli be bandla leZANU PF.
