Ukhansila uthi kawathengwe ngemali amacimbi eBulilima
Omunye walabo abanqobayo kukhetho lukakhansila esabelweni se Matabeleland South uthi ukhathazekile ngendlela isigaba esilahlekelwa ngakhona yinzuzo kwezemvelo ikakhulu amacimbi njengoba nje isigaba sawo sisondela.
Ekhuluma kuhlelo olwethulwa yi Community Podium, kuSkyz Metro FM, uNkosazana Makhadi Moyo owanqoba kuWard 16 eBulilima uthi isigaba siyalahlekelwa ngenxa yobuqili obenziwa ikakhulu yilabo abathengayo ngoba inengi lakhona alithengi ngemali kodwa libuya litshintshisa ngezinto ezitshiyeneyo ( barter trade).
“Kulohlupho olukhulu kakhulu ma sekumele izakhamisi zithengise amacimbi eziyabe ziwagolile ngoba kucina sekutshintshwanwa ngezintwana ezingatheni okwenza kubelokulahlekelwa kakhulu ma sesikhangele inzuzo ngoba uthola abanye betshintshisa ngemisakazo (amaradio) obonayo lawe ukuthi imali yakhona okuthengwe ngayo ayinganani. Kuqakathekile ukuthi njengoba isigaba samacimbi sisondela abafuna ukuthenga amacimbi bangabuyi lezintwana zokutshintshisa ngamacimbi kodwa babuye lemali ukuze umphakathi ubelenzuzo ukwazi ukuzithathela izinqumo ngaleyonzuzo”.
UNkosikazi Moyo wengeze wathi lokhu kutshintshana kuncindezela abagoli bamacimbi.
Ekuqaleni komnyaka, isigaba se Ningizimu eMatebeleland sakuveza obala ukuthi izakhamizi aziyitholi inzuzo yamacimbi ngenxa yokwanda kwabantu abasuka kwezinye izigaba bezohanqa lawomacimbi ma eselungele ukugolwa. Lokhu kwaphoqelela iMangwe ukuthi ifake imigomo lomthetho yokugolwa kwamacimbi lapho abagola amacimbi bayaphiwa iphepha elitshengisa isivumelwano phakathi kwekhansili kanye laleso sivakatshi. Lowo mthetho uvimbela njalo izakhamizi ukuthi zigcine izivakatshi ezigola amacimbi zingelayo imvumo.
Ilihlo Lemaphandleni luhlelo olulethwa yiCommunity Podium ngolwesine maviki onke ngehola lakuqala emini lapho okucubungulwa khona izehlakalo ezitshiyeneyo ezigabeni ze Matebeleland.
