Lafa elihle eTsholotsho
Providence Moyo
Badanile abahlali be Tsholotsho eMatebeleland North kulandela ukudlula emhlabeni komunye wabasunguli beqembu le Nsimbi ZeZhwane uElvis Mathe owaziwa kakhulu nguma Eli otshone engozini yemota izolo.
Omunye wabaculi obesebenzisana lomuyi uMxolisi Ndlovu owaziwa kakhulu ngokuthi ngu Mr Bones wethule umbiko ebulenjini bokuxhumana waveza ukudabuka ngalesisigameko wathi umufi kalale ngoxolo.
“Wahamba , Wahamba kanje nje mfanami kodwa soba yini sahlala sikhala.”
Omunye njalo umculi osebenzisane lo Ma Eli uZinjaziyamluma uveze ukudabuka njalo.
“Hamba kahle mfana wami, imisebenzi yakho ngeke yalibaleka, kulungile my boy kulungile mkhaya wami kulungile Zikomba kulungile makuvume wena Nkosi ngizamile ukukubheka emehlweni ngithi uzosabela kodwa akusenzekanga uvele walala ubuthongo bokugcina, hamba kahle mfana wami kulungile. “
Umlandeli weqembu uNkosini Sibanda uthe ukuziqhenya kwesigaba kuphelile.
“Hayi kwavela kwaphela ngeTsholotsho uyazi bengizizwa ngilesithunzi ngalaba abafana, besebyiphamisile ikithi ngilehloni angazi ngengezani ngibuhlungu kakhulu ungani ngiyaphupha ngempela “.
Umqondisi we Tsholotsho Arts Festival(TAF) umnumzana Topaz Ndlovu uveze ukudana okukhulu ngokusweleka kukama Eli wathi ubeliqhawe kwezomculo njalo bayaqhubeka beziqhenya ngomsebenzi awenzileyo esaphila.
“UMaEli utshiye usizi ebantwini lamuhlanje sidabukile emoyeni lala uphumule Qhawe umsebenzi wakho owenzileyo siyawuthanda sizasala sikukhumbula ngawo siyobonana kwelizayo njalo ngithi dudu kumuli yakhe silahlekelwe sonke- akulahlanga lungehlanga”.
Umkhokheli wesigaba saku ward 11 ukhansila Mutwell Ncube ukhuthaze labo abenelisa ukusiza ukuthi belule izandla umsebenzi ubelula.
“Balandeli abahle be Nsimbi ZeZhwane isimo sinzima kubafowethu lakumuli lakithi sonke. Asihlanganiseni amakhanda sincede abafowethu. Sicela abayenelisayo bafike eTsholotsho Watch Store eTsholotsho B.C babone uSimayedwa Ncube kumbe uMankosi bazabhala phansi bamukele esikuphosela engcebethwini. UMalume UMathe useyekhay uzabuya kusasa le account number ye NsimbiZeZhwane kulabo abaseGoli. Umuntu uyatsho lakunkundla zokuxhumana ukuthi ufisa ukuncedisa ngokunganani kulandelelwe. Sizadinga inumber eyecocash eyokwamukela usizo lwe RTGs. Abafuna ukusiza bangathinta u Simayedwa Ncube.”
uMaEli utshone ngemva kokuba imota abebehamba ngayo idubuke ivili okwenze yaphambuka emgwaqweni yayatshaya isihlahla yalimaza abanye abehamba labo abalitshumi yena wasweleka khonapho okwenzeke khona ingozi. Umzimba wakhe uthethwe wasiwa esibhedlela seSt Lukes kukanti abalitshumi abalimeleyo basesibhedlela esifanayo.
